ତୃତୀୟ ବିଶ୍ୱଯୁଦ୍ଧ ମୁହାଁ ହେଲା ଦୁନିଆ! ଜାଣନ୍ତୁ ୟୁକ୍ରେନ-ଋଷ ସଙ୍କଟରେ କେଉଁ ଦେଶ କାହା ସପକ୍ଷରେ ଛିଡା ହୋଇଛି?

ୟୁକ୍ରେନକୁ ନେଇ ଆମେରିକା ଓ ଋଷ ମଧ୍ୟରେ ଚାଲିଥିବା ବିବାଦ ଧୀରେ ଧୀରେ ବର୍ତ୍ତମାନ ଯୁଦ୍ଧ ଆଡ଼କୁ ଗତି କରୁଛି। ଉଭୟ ଦେଶ ମଧ୍ୟରେ କୂଟନୈତିକ ପ୍ରୟାସର ବିଫଳତା ହେବା ପରେ ଦିନକୁ ଦିନ ସ୍ଥିତି ଖରାପ ହେବାରେ ଲାଗିଛି ଓ ବର୍ତ୍ତମାନ ଦୁନିଆରେ ଆଉ ଏକ ମହା ଯୁଦ୍ଧର ଆଶଙ୍କା ଦେଖାଦେଇଛି। ଋଷର ରାଷ୍ଟ୍ରପତି ଭ୍ଲାଦିମିର ପୁଟିନ ୟୁକ୍ରେନର ପୂର୍ବ ଦୁଇଟି ବିଚ୍ଛିନ୍ନତାବାଦୀ ଅଞ୍ଚଳ “ଡୋନେଟସ୍କ ଓ ଲୁହାନସ୍କ ପିପୁଲ୍ସ ରିପବ୍ଲିକ” କୁ ସ୍ୱାଧୀନ ଦେଶ ଭାବରେ ସ୍ୱୀକୃତି ମିଳିବା ପରେ ୟୁକ୍ରେନ-ରୁଷର ତିକ୍ତତା ବର୍ତ୍ତମାନ ଆହୁରି ବଢ଼ିଯାଇଛି। ଋଷ ୟୁକ୍ରେନ ସୀମାରେ ୧.୫ ଲକ୍ଷରୁ ଅଧିକ ସୈନ୍ୟ ମୁତୟନ ହୋଇଛି, ଯାହା ବିଷୟରେ ପାଶ୍ଚାତ୍ୟ ଦେଶମାନେ କହିଛନ୍ତିଯେ ଋଷ ଯେକୌଣସି ସମୟରେ ୟୁକ୍ରେନ ଆକ୍ରମଣ କରିପାରେ। ଅଷ୍ଟ୍ରେଲିଆର ପ୍ରଧାନମନ୍ତ୍ରୀ ସ୍କଟ ମୋରିସନ କହିଛନ୍ତିଯେ ଋଷର ୟୁକ୍ରେନ ଉପରେ ଆକ୍ରମଣ ୨୪ ଘଣ୍ଟା ମଧ୍ୟରେ ଆରମ୍ଭ ହୋଇପାରେ।

ଅନ୍ୟପଟେ ଋଷ କହିଛିଯେ ଆକ୍ରମଣ କରିବାର କୌଣସି ଯୋଜନା ନାହିଁ ଓ ଋଷର ସେନା ୟୁକ୍ରେନ ସୀମାରେ ଦେଶକୁ ନାଟୋ ବିସ୍ତାରରୁ ରକ୍ଷା କରିବା ପାଇଁ ଠିଆ ହୋଇଛି। ଏହି ସମୟରେ ପୁଟିନଙ୍କ ଘୋଷଣା ଆମେରିକା ସମେତ ପାଶ୍ଚାତ୍ୟ ଦେଶକୁ ଉତ୍ତେଜିତ କରିଛି। ଆମେରିକା ଓ ପାଶ୍ଚାତ୍ୟ ଦେଶଗୁଡିକ ମଧ୍ୟ ଋଷ ଉପରେ ବର୍ତ୍ତମାନ କଡ଼ା ପ୍ରତିବନ୍ଧକ ଘୋଷଣା କରିଛନ୍ତି।

ଏହି ସମୟରେ କେଉଁ ଦେଶ କାହା ସହ ଅଛି ସେନେଇ ବର୍ତ୍ତମାନ ଏହି ବିତର୍କ ତୀବ୍ର ହୋଇଯାଇଛି। ଭାରତ କାହାକୁ ସମର୍ଥନ କରିବ, ଉଭୟ ଆମେରିକା ଓ ଋଷର ନଜର ଏହା ଉପରେ ଅଛି, କିନ୍ତୁ ଭାରତ ବର୍ତ୍ତମାନ ପର୍ଯ୍ୟନ୍ତ ଏହି ପ୍ରସଙ୍ଗରେ ନିରପେକ୍ଷତା ବଜାୟ ରଖିଛି।

ୟୁକ୍ରେନ ପ୍ରସଙ୍ଗରେ ପ୍ରମୁଖ ଦେଶ ଗୁଡିକର ଆଭିମୁଖ୍ୟ କ’ଣ?

ଆମେରିକା:-

ୟୁକ୍ରେନ ସୀମାରେ ଋଷର ସୈନ୍ୟ ସଂଖ୍ୟା ବଢ଼ାଇକୁ ଆମେରିକା ବିରୋଧ କରିଆସୁଛି। ସେ ସର୍ବଦା ଚେତାବନୀ ଦେଇ ଆସୁଛିକି, ରୁଷୀୟ ସୈନ୍ୟମାନେ ଯେ କୌଣସି ସମୟରେ ୟୁକ୍ରେନ ଉପରେ ଆକ୍ରମଣ କରିପାରନ୍ତି। ଋଷର ରାଷ୍ଟ୍ରପତିଙ୍କ ୟୁକ୍ରେନର ଦୁଇଟି ବିଚ୍ଛିନ୍ନତାବାଦୀ ଅଞ୍ଚଳକୁ ସ୍ୱାଧୀନ ଅଞ୍ଚଳ ଭାବରେ ସ୍ୱୀକୃତି ଦେଇଥିବାରୁ ଋଷ ଉପରେ ଆମେରିକା ନିଜର କଠୋର କଟକଣା ଜାରି କରିଛି।

ଜୋ ବାଇଡେନ ଋଷର ଦୁଇଟି ଆର୍ଥିକ ପ୍ରତିଷ୍ଠାନ VEB ଓ ଋଷୀ ମିଲିଟାରୀ ବ୍ୟାଙ୍କ ଉପରେ ପ୍ରତିବନ୍ଧକ ଲଗାଇଛନ୍ତି। ଅନ୍ତର୍ଜାତୀୟ ଆର୍ଥିକ ବ୍ୟବସ୍ଥାରୁ ଋଷର ଅର୍ଥନୀତିର କିଛି ଅଂଶ ହଟାଯାଉଛି ବୋଲି ବାଇଡେନ ଏଥିରେ ଘୋଷଣା କରିଛନ୍ତି। ଏହା ସହ ଆମେରିକା ଋଷର ଧନୀ ଲୋକ ଓ ସେମାନଙ୍କର ପରିବାର ଉପରେ ମଧ୍ୟ କଟକଣା ଲାଗୁ କରୁଛି।

ଏହା ସହିତ ଆମେରିକା ୟୁକ୍ରେନକୁ ଅସ୍ତ୍ରଶସ୍ତ୍ର ମାଧ୍ୟମରେ ସହାୟତା ଦେଉଅଛି। ମଙ୍ଗଳବାର ଦିନ ୟୁକ୍ରେନର ବୈଦେଶିକ ମନ୍ତ୍ରୀ ଦିମିତ୍ରୋ କୁଲେବା କହିଛନ୍ତିଯେ ୟୁକ୍ରେନକୁ ଆମେରିକା ଅଧିକ ଅସ୍ତ୍ରଶସ୍ତ୍ର ଯୋଗାଇବାର ପ୍ରତିଶୃତି ଦେଇଛି। ତେବେ ୟୁକ୍ରେନରେ ଋଷ ବିରୁଦ୍ଧରେ ସେନା ପଠାଇବ ନାହିଁ ବୋଲି ଆମେରିକା ସ୍ପଷ୍ଟ କରିଦେଇଛି।

ଭାରତ:-

ଭାରତ ଉଭୟ ଆମେରିକା ଓ ଋଷର ନିକଟତର। ଆମେରିକା ଚାହୁଁଛି ଯେ ଭାରତ ତାକୁ ସମର୍ଥନ କରୁ କିନ୍ତୁ ଋଷ ସହ ଭାରତର ରଣନୀତିକ ଭାଗିଦାରୀ ବହୁତ ଅଧିକ ରହିଛି। ପ୍ରତିରକ୍ଷା ଉପକରଣ ପାଇଁ ଋଷ ଉପରେ ଭାରତର ନିର୍ଭରଶୀଳତା ରହିଆସିଛି। ଚୀନ ସୀମାରେ ଉତ୍ତେଜନା ମଧ୍ୟରେ ମଧ୍ୟ ଭାରତ ପାଇଁ ଋଷର ସମର୍ଥନ ଆବଶ୍ୟକ କରୁଛି। ଏଭଳି ସ୍ଥିତିରେ ଭାରତ ପାଇଁ କୌଣସି ପକ୍ଷ ରଖିବା ଅତ୍ୟନ୍ତ କଷ୍ଟକର ହେବ। ଭାରତ ବର୍ତ୍ତମାନ ପର୍ଯ୍ୟନ୍ତ ଏହି ପ୍ରସଙ୍ଗରେ ଏକ ନିରପେକ୍ଷ ଆଭିମୁଖ୍ୟ ଗ୍ରହଣ କରିଛି।

ମିଳିତ ଜାତିସଂଘ ସୁରକ୍ଷା ପରିଷଦରେ ୟୁକ୍ରେନର ପରିସ୍ଥିତିକୁ ନେଇ ଜରୁରୀକାଳୀନ ବୈଠକରେ ଭାରତ ଏକ ସନ୍ତୁଳିତ ଆଭିମୁଖ୍ୟ ଗ୍ରହଣ କରିଛି ଏବଂ କହିଛିଯେ ଏହି ପ୍ରସଙ୍ଗରେ ସମସ୍ତ ପକ୍ଷ ନିଜକୁ ସଂଯମ କରିବା ଉଚିତ।

ୟୁରୋପୀୟ ୟୁନିଅନ:-

ୟୁରୋପୀୟ ପରିଷଦର ଅଧ୍ୟକ୍ଷ ଚାର୍ଲ୍ସ ମାଇକେଲ ୟୁକ୍ରେନ ସହିତ ଏକତା ଦେଖାଇ କହିଛିଯେ ୟୁକ୍ରେନ ପ୍ରତି ବିପଦ ସମଗ୍ର ୟୁରୋପ ପାଇଁ ବିପଦ ଅଟେ। ଋଷୀ ବ୍ୟାଙ୍କ ଓ EU ର ଆର୍ଥିକ ବଜାର ପର୍ଯ୍ୟନ୍ତ ଋଷର ପ୍ରବେଶ ଉପରେ ପ୍ରତିବନ୍ଧକ ଲଗାଇଛି। ଏହା ସହ EU ସେହି ଋଷୀ ସାଂସଦଙ୍କୁ ଟାର୍ଗେଟ କରିବାକୁ ଯୋଜନା କରୁଅଛି। ଯେଉଁମାନେ ୟୁକ୍ରେନକୁ ନେଇ ଋଷ ସପକ୍ଷରେ ସହମତ ହୋଇଛନ୍ତି। EU ମଧ୍ୟ ଋଷକୁ ବିଶ୍ୱ ବ୍ୟାଙ୍କିଙ୍ଗ୍ ସିଷ୍ଟମରୁ କାଟି ଦେଇପାରେ।

ବ୍ରିଟେନ:-

ବ୍ରିଟେନ କହିଛିଯେ ୟୁକ୍ରେନ ଉପରେ ଋଷର ଆକ୍ରମଣ ଆରମ୍ଭ କରିସାରିଛି। ଓ ଏହାକୁ ଦୃଷ୍ଟିରେ ରଖି ଋଷ ଉପରେ କଟକଣା କଡାକଡି କରାଯିବ। ପ୍ରଧାନମନ୍ତ୍ରୀ ବୋରିସ ଜନସନ କହିଛନ୍ତିଯେ, ଏହା ଅତ୍ୟନ୍ତ ବିପଜ୍ଜନକ ସଙ୍କେତ ମଧ୍ୟ ହୋଇପାରେ ଓ ଋଷର ଏହି ପଦକ୍ଷେପ ୟୁକ୍ରେନର ସାର୍ବଭୌମତ୍ୱକୁ ସମ୍ପୂର୍ଣ୍ଣ ରୂପରେ ଉଲ୍ଲଂଘନ କରିବ।

ବ୍ରିଟେନ ଋଷର ୬ଟି ବ୍ୟାଙ୍କ ଉପରେ ସମ୍ପୂର୍ଣ ରୂପରେ ପ୍ରତିବନ୍ଧକ ଲଗାଇଛି। ଋଷର ତିନୋଟି ବଡ଼ ବିଲିୟନେୟାରଙ୍କ ବ୍ରିଟେନ ସ୍ଥିତ ସମ୍ପତ୍ତି ମଧ୍ୟ ଫ୍ରିଜ କରାଯାଇଛି ଓ ସେମାନଙ୍କର ବ୍ରିଟେନରେ ପ୍ରବେଶ ଉପରେ ମଧ୍ୟ ପ୍ରତିବନ୍ଧକ ଲଗାଯାଇଛି।

ଚୀନ:-

ସାମ୍ପ୍ରତିକ ସମୟରେ ଋଷ ଓ ଚୀନ ମଧ୍ୟରେ ଘନିଷ୍ଠତା ମଧ୍ୟ ବୃଦ୍ଧି ପାଇଛି। ଆମେରିକା ସହ ଚୀନର ସମ୍ପର୍କ ଏକ ଖରାପ ସ୍ଥିତିରେ ବର୍ତ୍ତମାନ ପହଞ୍ଚିଯାଇଛି। ବିଗତ ଦିନରେ ଚାଇନାର ବୈଦେଶିକ ମନ୍ତ୍ରୀ ୱାଙ୍ଗ ୟି ଋଷର ସୁରକ୍ଷା ଚିନ୍ତାକୁ ଠିକ ବୋଲି କହିଛନ୍ତି। ସେ କହିଛନ୍ତିଯେ ଏହାକୁ ଗୁରୁତର ସହ ନିଆଯିବା ଉଚିତ ଓ ଏହାର ସମାଧାନ ମଧ୍ୟ କରାଯିବା ଉଚିତ।

ଋଷ ଚାହୁଁ ନାହିଁଯେ ୟୁକ୍ରେନ ନାଟୋରେ ଯୋଗ ଦିଅନ୍ତୁ, କିନ୍ତୁ ଆମେରିକା, ପାଶ୍ଚାତ୍ୟ ଦେଶ ଏବଂ ୟୁକ୍ରେନ ମଧ୍ୟ ଚାହୁଁଛନ୍ତିଯେ ୟୁକ୍ରେନ ନାଟୋର ସଦସ୍ୟ ହୁଅନ୍ତୁ। ଏହି ପ୍ରସଙ୍ଗରେ ଉତ୍ତେଜନା ଧୀରେ ଧୀରେ ବୃଦ୍ଧି ପାଇଛି। ଋଷର ଏହି ସୁରକ୍ଷା ଚିନ୍ତାକୁ ଦର୍ଶାଇ ଚୀନ କହିଛିଯେ ଋଷର ଚିନ୍ତାକୁ ଧ୍ୟାନରେ ରଖିବାକୁ ହେବ। ଚୀନର ପକ୍ଷ ଋଷ ଆଡକୁ ରହିଛି, କିନ୍ତୁ ବର୍ତ୍ତମାନ ପର୍ଯ୍ୟନ୍ତ ଚୀନ ଋଷର ଏହି ପଦକ୍ଷେପକୁ ସମର୍ଥନ କରିନାହିଁ। ଚୀନ ମଧ୍ୟ ଭାରତ ଭଳି ନିଜକୁ ସନ୍ତୁଳିତ ବୟାନ ଦେଉଛି। ତେବେ ମିଳିତ ଜାତିସଂଘ କିମ୍ବା ଅନ୍ୟାନ୍ୟ ଫୋରମରେ ଚାଇନା ଋଷକୁ ସମର୍ଥନ କରିପାରେ ବୋଲି କୁହାଯାଉଛି।

ଫ୍ରାନ୍ସ:-

ଋଷର ରାଷ୍ଟ୍ରପତି ପୁଟିନ ସୋମବାର ଦିନ ୟୁକ୍ରେନର ଦୁଇଟି ଅଞ୍ଚଳକୁ ସ୍ୱାଧୀନ ରାଜ୍ୟ ଭାବରେ ସ୍ୱୀକୃତି ଦେଇଛନ୍ତି। ପୁଟିନଙ୍କ ସମ୍ୱୋଧନକୁ ପାଗଳାମି ବୋଲି ଫ୍ରାନ୍ସ କହିଛି। ଫ୍ରାନ୍ସ କହିଛିଯେ, ଋଷର ରାଷ୍ଟ୍ରପତି ଫ୍ରାନ୍ସର ରାଷ୍ଟ୍ରପତି ଇମାନୁଏଲ ମାକ୍ରୋନଙ୍କୁ ଦେଇଥିବା ପ୍ରତିଶ୍ରୁତିକୁ ଭାଙ୍ଗିଛନ୍ତି ଓ ବର୍ତ୍ତମାନ ଫ୍ରାନ୍ସ ମଧ୍ୟ ଋଷ ବିରୋଧରେ କଠୋର କଟକଣା ଲାଗୁ କରିବ।

ୟୁରୋପୀୟ ୟୁନିଅନର ଋଷ ଉପରେ ଲାଗୁ କରାଯାଇଥିବା ପ୍ରତିବନ୍ଧକକୁ ଫ୍ରାନ୍ସ ମଧ୍ୟ ସ୍ୱାଗତ କରିଛି। ମାକ୍ରୋନ କ୍ରମାଗତ ଭାବରେ କହୁଛନ୍ତିଯେ ଯଦି ୟୁକ୍ରେନ ଉପରେ ଆକ୍ରମଣ କରେ ତେବେ ଋଷକୁ ଏକ ବଡ ମୂଲ୍ୟ ପରିଶୋଧ କରିବା ପାଇଁ ପଡ଼ିବ।

ଜର୍ମାନୀ:-

ଜର୍ମାନୀ ଋଷର ନର୍ଡ ଷ୍ଟ୍ରିମ ୨ ଗ୍ୟାସ ପାଇପଲାଇନକୁ ବନ୍ଦ କରିଦେଇଛି। ଏହି ପ୍ରକଳ୍ପ ମାଧ୍ୟମରେ ଋଷ ଜର୍ମାନୀକୁ ଗ୍ୟାସ ବିତରଣ କରିବାକୁ ଯାଉଥିଲା। ଋଷର ସମ୍ପ୍ରତି ପଦକ୍ଷେପ ନେଇ ଏହି ନିଷ୍ପତ୍ତି ନିଆଯାଇଛି ବୋଲି ଜର୍ମାନୀ କହିଛି। ଆରମ୍ଭରୁ ଜର୍ମାନୀ ୟୁକ୍ରେନ ପାଖରେ ଛିଡ଼ା ହୋଇଛି।

ବେଲାଋଷ:-

ବେଲାଋଷ ଋଷର ଅତି ଘନିଷ୍ଠ ସହଯୋଗୀ ଅଟେ। ଏକ ସମୟରେ ଯେତେବେଳେ ଋଷ-ୟୁକ୍ରେନ ତିକ୍ତତା ଚରମ ସୀମାରେ ପହଞ୍ଚିଛି ଓ ଯୁଦ୍ଧ ଯେକୌଣସି ସମୟରେ ଆରମ୍ଭ ହୋଇପାରେ। ସେତେବେଳେ ବେଲାଋଷ ସହ ଋଷ ସାମରିକ ଅଭ୍ୟାସ କରୁଅଛି ଫେବୃଆରୀ ୧୦ ତାରିଖରେ ଆରମ୍ଭ ହୋଇଥିବା ଏହି ସାମରିକ ଅଭ୍ୟାସ ଫେବୃଆରୀ ୨୦ ତାରିଖରେ ଶେଷ ହେବାର ଥିଲା, କିନ୍ତୁ ବର୍ତ୍ତମାନ ଏହାକୁ ବୃଦ୍ଧି କରାଯାଇଛି। ଉଭୟ ଦେଶର ସୈନ୍ୟବାହିନୀ ୟୁକ୍ରେନ ସୀମା ନିକଟରେ ସାମରିକ ଅଭ୍ୟାସ କରୁଛନ୍ତି।

ସୋମବାର ବେଲାଋଷ କହିଛିଯେ, ନାଟୋ ପ୍ରତ୍ୟାହାର କରିବା ସ୍ଥିତିରେ ଋଷ ସୈନ୍ୟମାନେ ତା’ର ଅଞ୍ଚଳ ଛାଡିବେ। ନାଟୋରେ ସାମିଲ ଦେଶ ପୋଲାଣ୍ଡ, ଲାଟଭିଆ ଏବଂ ଲିଥୁଆନିଆର ସୀମା ବେଲାଋଷ ସହ ଲାଗିଛି, ଯେଉଁଠାରେ ନାଟୋ ସୈନ୍ୟବାହିନୀ ମୁତୟନ ହୋଇଛନ୍ତି

ଇଟାଲୀ:-

ଇଟାଲୀ ଏହି ପ୍ରସଙ୍ଗରେ କହିଛିକି, ଏହି ସମସ୍ୟାର ଶାନ୍ତିପୂର୍ଣ୍ଣ ସମାଧାନ ଚାହୁଁଛି। ଏଥିସହ ନାଟୋକୁ ନେଇ ନିଜର ପ୍ରତିଶ୍ରୁତି ରକ୍ଷା କରିବ ବୋଲି ଇଟାଲୀ ନିଜ ମନ୍ତବ୍ୟରେ କହିଛି।

କ୍ରୋଏସିଆ:-

କ୍ରୋଏସିଆ ମଧ୍ୟ ଏହି ପ୍ରସଙ୍ଗରେ ଋଷର ପକ୍ଷ ନେଇଛି। କ୍ରୋଏସିଆ କହିଛିଯେ ଋଷର ସୁରକ୍ଷା ଚିନ୍ତାକୁ ବିଚାର କରାଯିବା ଆବଶ୍ୟକ। କିଛି ସମୟ ପୂର୍ବରୁ କ୍ରୋଏସିଆର ରାଷ୍ଟ୍ରପତି ଜୋରାନ୍ ମିଲାନୋଭିକ୍ କହିଥିଲେଯେ ଯଦି ଋଷ ସହ ବିବାଦ ବଢ଼ିଯାଏ, ତେବେ ସେ ବିଶ୍ୱର ସବୁଠାରୁ ଦୁର୍ନୀତିଗ୍ରସ୍ତ ଦେଶ ୟୁକ୍ରେନକୁ ନୁହେଁ, ବରଂ ଋଷକୁ ସମର୍ଥନ କରିବେ।

ଯେତେବେଳେ ତାଙ୍କର ବୟାନକୁ ନେଇ ଦେଶରେ ହଙ୍ଗମା ହେଲା, ସେତେବେଳେ ପ୍ରଧାନମନ୍ତ୍ରୀ ଆଣ୍ଡ୍ରେଜେ ପ୍ଲାନକୋଭିକ୍ ଏହାକୁ ଖଣ୍ଡନ କରିବାକୁ ପଡିଥିଲା। ସେ କହିଛନ୍ତିଯେ ସରକାରଙ୍କ ତରଫରୁ ସେ ୟୁକ୍ରେନବାସୀଙ୍କୁ କ୍ଷମା ମାଗୁଛନ୍ତି। ଏଥିସହିତ ସେ ଆହୁରି ମଧ୍ୟ ମନେ ପକାଇଦେଇଥିଲେଯେ ଯେତେବେଳେ କ୍ରୋଏସିଆ ଯୁଗୋସ୍ଲାଭିଆଠାରୁ ଅଲଗା ହେଲା, ସେତେବେଳେ ଏହାକୁ ପ୍ରଥମେ ୟୁକ୍ରେନ ସ୍ୱୀକୃତି ଦେଇଥିଲା।

ଜାପାନ:-

ଜାପାନ କହିଛିଯେ ଯଦି ଋଷ ୟୁକ୍ରେନ ଉପରେ ଆକ୍ରମଣ କରେ ତେବେ ସେ ଆମେରିକାକୁ ସମର୍ଥନ କରିବ। ପ୍ରଧାନମନ୍ତ୍ରୀ ଫୁମିଓ କିଶିଦା ଋଷର ଏହି ପଦକ୍ଷେପକୁ ନିନ୍ଦା କରି କହିଛନ୍ତି। ଏହା ଅନ୍ତର୍ଜାତୀୟ ନିୟମ ଓ ୟୁକ୍ରେନର ସାର୍ବଭୌମତ୍ୱର ଉଲ୍ଲଂଘନ କରୁଛି। ଯେତେବେଳେ ଋଷ ୟୁକ୍ରେନର ଡୋନେଟସ୍କ ଏବଂ ଲୁହାନସ୍କକୁ ସ୍ୱାଧୀନ ଅଞ୍ଚଳ ଭାବରେ ସ୍ୱୀକୃତି ଦେଇଛି। ସେହି ସମୟରେ ଏହି ଅଞ୍ଚଳଗୁଡିକର ଧନୀ ଲୋକମାନଙ୍କ ଜାପାନ ସ୍ଥିତ ସମ୍ପତ୍ତି ଫ୍ରିଜ ହୋଇଯାଇଛି ଓ ସେମାନଙ୍କର ଭିସା ମଧ୍ୟ ବାତିଲ କରିଦିଆଯାଇଛି।

ମଧ୍ୟ-ପୂର୍ବ ଦେଶ:-

ଯଦି ଋଷ-ୟୁକ୍ରେନ ମଧ୍ୟରେ ଯୁଦ୍ଧ ଆରମ୍ଭ ହୁଏ, ତେବେ ମଧ୍ୟ ପୂର୍ବର ସମସ୍ତ ଦେଶ ଉପରେ ଏହାର ଗଭୀର ପ୍ରଭାବ ପଡ଼ିବ। ଏହି ଦେଶଗୁଡିକରେ ମୁଦ୍ରାସ୍ଫୀତି ମଧ୍ୟ ବୃଦ୍ଧି ପାଇବ, ଯେଉଁ କାରଣରୁ ଦେଶରେ ଉତ୍ତେଜନା ଏବଂ ହିଂସା ବୃଦ୍ଧି ହେବାର ସମ୍ଭାବନା ଅଧିକ ଅଛି। ଏହା ଦ୍ୱାରା ସେଠାରେ ରାଜନୈତିକ ଅସ୍ଥିରତା ମଧ୍ୟ ଦେଖାଯାଇପାରେ।

ନାଟୋର ସଦସ୍ୟ ତୁର୍କୀ ମଧ୍ୟ ଋଷର ନିକଟତର ରହିଛି। ତେବେ ରାଷ୍ଟ୍ରପତି ରିସେପ ତାଇପ ଏର୍ଦୋଗନ ଋଷର ସମ୍ପ୍ରତି ପଦକ୍ଷେପ ଗ୍ରହଣୀୟ ନୁହେଁ ବୋଲି ନିଜର ଉକ୍ତିରେ କହିଛନ୍ତି। ସମସ୍ତ ଦଳ ଅନ୍ତର୍ଜାତୀୟ ନିୟମ ପାଳନ କରିବା ଉଚିତ ବୋଲି ସେ କହିଛନ୍ତି। ତୁର୍କୀ ଏହା ସହିତ ପାଶ୍ଚାତ୍ୟ ଦେଶଗୁଡ଼ିକୁ ମଧ୍ୟ ସମାଲୋଚନା କରିଛିଯେ ସେମାନେ ଏହି ସଙ୍କଟର ମୁକାବିଲା ସଠିକ ଭାବରେ କରିପାରୁ ନାହାଁନ୍ତିୁ।

ଅନ୍ୟପଟେ, ସାଉଦି ଆରବ, ସଂଯୁକ୍ତ ଆରବ ଏମିରେଟ୍ସ ଇତ୍ୟାଦି ଦେଶଗୁଡିକର ଆମେରିକା ସହିତ ନିକଟତରତା ବୃଦ୍ଧି ହୋଇଛି। କିନ୍ତୁ ଋଷ ସହ ସେମାନଙ୍କର ଭଲ ସମ୍ପର୍କ ମଧ୍ୟ ଅଛି। ତେଣୁ, ଏହି ଦେଶଗୁଡିକ ପାଇଁ କୌଣସି ପ୍ରକାର ପକ୍ଷ ରଖିବା କଷ୍ଟକର ହେବ।