ଦିନିକିଆ ବିଶ୍ୱକପ୍ 2023 ଖେଳିବାକୁ ବାବର ଆଜମଙ୍କ ନେତୃତ୍ବରେ ପାକିସ୍ତାନ ଦଳ ଭାରତ ଆସିଛି। ଏଠାରେ ଦଳକୁ ଭବ୍ୟ ସ୍ୱାଗତ କରାଯାଇଥିଲା, କିନ୍ତୁ ଖେଳାଳିଙ୍କ ମେନ୍ୟୁରେ ଗୋମାଂସ ନଥିବାକୁ ନେଇ ପ୍ରଶ୍ନ ଉଠାଇଛି ପାକିସ୍ତାନ କ୍ରିକେଟ ବୋର୍ଡ।
କିନ୍ତୁ ପିସିବିର ଏହି ଦାବିକୁ ନେଇ ସ୍ୱୟଂ ପାକିସ୍ତାନରେ ବି ଲୋକେ ନାପସନ୍ଦ କରୁଛନ୍ତି। ଅବଶ୍ୟ ଗୋମାଂସ ନମିଳିବାକୁ ନେଇ ପାକିସ୍ତାନୀ ଖେଳାଳିମାନେ କୌଣସି ଆପତ୍ତି ଉଠାଇନାହାନ୍ତି। ପାକିସ୍ତାନ କ୍ରିକେଟ ବୋର୍ଡ ଅଧ୍ୟକ୍ଷ ଜାକା ଅଶରଫ ଭାରତକୁ ଶତ୍ରୁ ରାଷ୍ଟ୍ର ବୋଲି ବର୍ଣ୍ଣନା କରିଛନ୍ତି।
ଏହି କାରଣରୁ ବୋର୍ଡକୁ ବିଭିନ୍ନ ମହଲରୁ ସମାଲୋଚନା କରାଯାଉଛି। ପାକିସ୍ତାନର ସାମ୍ବାଦିକଙ୍କ ସମେତ ସେଠାକାର ଲୋକମାନେ ମଧ୍ୟ ଗୋମାଂସ ମାମଲାକୁ ଅନାବଶ୍ୟକ ବୋଲି କହିଛନ୍ତି। ପାକିସ୍ତାନୀ ସାମ୍ବାଦିକ ଆର୍ଫା ଫିରୋଜ ଏକ୍ସରେ ଲେଖିଛନ୍ତି, ”ପିସିବି ଦ୍ୱାରା ପାକିସ୍ତାନ ଆସୁଥିବା ଅଣ-ମୁସଲିମ କ୍ରିକେଟରଙ୍କୁ ଗୋମାଂସ ବା ଘୁଷୁରି ମାଂସ ଦିଆଯାଉଛି କି?
ପାକିସ୍ତାନ କ୍ରିକେଟ୍ ଦଳକୁ ଗୋମାଂସ ନ ମିଳିବା ଉପରେ ପ୍ରଶ୍ନ ଉଠାଇବା ଭୁଲ୍। ଭ୍ରମଣକାରୀ ଦେଶମାନେ ଆୟୋଜକଙ୍କ ସଂସ୍କୃତି ଓ ପରମ୍ପରାକୁ ସମ୍ମାନ ଦେବା ଉଚିତ। ଏହା ଅଯଥା କଥା।” ଅନ୍ୟ ଜଣେ ଲେଖିଛନ୍ତି ଯେ ପ୍ରତ୍ୟେକ ଦେଶର ନିଜସ୍ୱ ସଂସ୍କୃତି ରହିଛି। ସମସ୍ତେ ଅନ୍ୟର ମୂଲ୍ୟବୋଧ ପ୍ରତି ଯତ୍ନବାନ ହେବା ଉଚିତ୍। ଭାରତର ଅନେକ ରାଜ୍ୟରେ ଗୋମାଂସ ନିଷିଦ୍ଧ। ଏଭଳି ସ୍ଥିତିରେ ବିଶ୍ବକପରେ ପ୍ରବେଶ କରୁଥିବା କୌଣସି ଦଳକୁ ଗୋମାଂସ ଦିଆଯିବ ନାହିଁ।
